A nosa achega á educación infantil

Posts Tagged ‘experimentación’

De onde vén a sombra

In EncienciArte on 03/05/2011 at 21:01

“Sae detrás nosa da casa e logo ponse diante.” “Segue ao sol.” “Está pegada ao chan.” “A sombra dá frío.” “Se ti es grande a sombra é grande se es pequeno é pequena.” “Se te moves a sombra móvese.” “Cada un só temos unha sombra.” “Se non tes amigos podes xogar ao pilla pilla coa sombra.” “A sombra é negra e se hai pedras brancas é branca.” “Todas as sombras son negras.” “Cando hai máis sol a sombra é máis longa, cando o sol está coma a lúa chea.” “Na casa hai sombra cando se acende a luz.” “A sombra sempre te toca polos pés, menos na piscina que vai por debaixo, ponse no fondo da auga e non te toca.” “A sombra das cousas que van polo aire tamén vai polo chan.”

Estes e outros moitos son os seus coñecementos previos sobre a sombra. Algúns dos cales trataremos de comprobar e confirmar ou desmentir.

Empezamos a xogar coas sombras. Faremos comprobacións periódicas ao longo do día sobre a sombra dalgún elemento fixo do patio, por exemplo as árbores e logo tiraremos conclusións sobre a súa orixe, tamaño, posición e cor.

Advertisements

Sombras de cores

In EncienciArte on 26/01/2011 at 15:00

Os primeiros raios de sol invernais permítennos facer xogos de luz e de cor.

Tras o marabilloso descubrimento de como se mesturan as cores dos acetatos, de como o seu reflexo tingue o que lle poñemos debaixo –pedras, folios, o seu propio corpo-, probamos a ver o que acontecía cando abríamos a xanela e o vento pon en movemento todas as bolas do teito e maila cortina da luz de cores.

Xa o pasado curso xogáramos coa sombra e fixéramos interesantes descubertas. Continuaremos experimentando.

Ver presentación.

A noite dos investigadores

In EncienciArte on 23/09/2010 at 23:43

O vindeiro venres, 24 de setembro, celebrarase “A noite dos investigadores”, unha acción para a divulgación da cultura científica que terá lugar en máis de 200 cidades de 30 países europeos. En España participan Oviedo, Murcia, Burgos, Girona, Santiago de Compostela e Las Palmas de Gran Canaria. A Comunidade de Madrid desenvolverá 18 actividades en 13 sedes de toda a rexión.

A Delegación do CSIC en Galicia lidera o proxecto na nosa comunidade coa colaboración do departamento de educación do concello de Santiago de Compostela.

Baixo o lema “Esperta na noite dos investigadores. Hoxe ceamos Ciencia”, os científicos empregarán os alimentos como fío condutor das súas explicacións, facendo experimentos, falando de ciencia, con documentais, xogos, etc.

No IES Rosalía de Castro, entre as 17:00-22:00h., poderemos asistir de balde as actividades recollidas no programa:

-Representación teatral: “Ciencia que alimenta”

-Obradoiros: “Que comía a xente dos castros? Banquete na Lanzada”; “Arenoglifos. Leva á casa o teu petroglifo”; “Mellorando o pan de millo”; “Os segredos da viña”; “Sal de mesa nos océanos”; “Mergúllate nas rías: despensa de peixes e mariscos”; “O nunca visto: o pasado baixo o microscopio”; “Arqueoloxía en 3D”; “Arqueoloxía nun clic: A Lanzada e Castrolandín”

Segundo recolle na carta de convocatoria, poderanse ver, tamén, exposicións e facer degustacións de produtos.

A ciencia ao alcance de todas as idades, especialmente dos máis pequenos.

Que tempo fai hoxe?

In EncienciArte on 31/01/2010 at 11:44

Unha das rutinas máis habituais das aulas de infantil é a observación do tempo atmosférico, así como a súa consignación. O web de MeteoGalicia  permítenos coñecer o tempo, as predicións a corto, medio e longo prazo nas distintas localidades de Galicia. Conta, así mesmo, cunha sección dedicada á educación, alí atopamos fotografías, vídeos, gráficos e definicións do clima atmosférico e da temperatura, do vento e as precipitacións, tormentas, arcos da vella, auroras, imaxes de satélite e ata curiosidades como récords meteorolóxicos, animais e meteoroloxía, datos recollidos nas estacións situadas nas MeteoEscolas, etc. Achegar ao alumnado a ferramentas e canles que lle permiten atopar información “real” que se corresponde coa realidade que están vendo cos seus ollos. As imaxes reais dificilmente se poden superar; atopar semellanzas entre o que lles pedimos que observen no ceo e os símbolos que empregamos para constatalo é, máis das veces, un acto de fe.

O CSIC na escola

In EncienciArte on 31/01/2010 at 10:48

O CSIC na escola é un proxecto de colaboración entre o Consejo Superior de Investigaciones Científicas e a Fundación BBVA. Neste proxecto investigadores e docentes traballan conxuntamente co fin de introducir e fomentar o ensino da ciencia desde as primeiras etapas da educación. É moi interesante descubrir como as nenas e os nenos, aplicando métodos estritamente experimentais, modifican as súas ideas previas e adquiren unha visión científica da natureza.

Desde fai algún anos, hai experiencias galegas de aplicación do programa CSIC en la escuela con nenos e nenas de educación infantil, e ademais ben recoñecidas, recentemente recolleron un premio nun congreso da institución en Granada. As docentes que o están a desenvolver amósanse totalmente entusiasmadas cando descobren que se pode ensinar ciencia a partir da observación de fenómenos cotiás, por medio de sinxelos experimentos. 

No web do CSIC pódense atopar experiencias sobre a flotación, o magnetismo, óptica e electricidade, entre outras, realizadas con alumnado de educación infantil.