A nosa achega á educación infantil

Posts Tagged ‘clima’

ExpoMeteoro

In EncienciArte on 18/02/2011 at 08:00

En máis dunha ocasión temos comentado como facemos observacións do ceo e do estado do tempo. Nestes días de condicións meteorolóxicas tan adversas non deixamos pasar a ocasión de coñecer máis da climatoloxía, para ilo contamos co web ExpoMeteoro, unha iniciativa de MeteoGalicia no que atopamos información sobre o clima, as nubes, o sol, os mapas do tempo, a meteoroloxía extrema ou da predición meteorolóxica –con explicacións sobre os aparellos como cataventos, termómetros, pluviómetros, etc.

Permite a descarga de paneis informativos sobre cada un destes temas.

Tamén conta cun interesante apartado “Tempo e lingua”, no que recollen frases e refráns referidos ao clima e ao tempo, que nos axudan a facer as nosas anticipacións, tales como:

-“Arco da vella á mañanciña, prepara a capotiña”

-“Arco da vella ao mediodía, chuvia para todo o día”

-“Arco da vella ó anoitecer, bo tempo ó mencer”

Que tempo fai hoxe?

In EncienciArte on 31/01/2010 at 11:44

Unha das rutinas máis habituais das aulas de infantil é a observación do tempo atmosférico, así como a súa consignación. O web de MeteoGalicia  permítenos coñecer o tempo, as predicións a corto, medio e longo prazo nas distintas localidades de Galicia. Conta, así mesmo, cunha sección dedicada á educación, alí atopamos fotografías, vídeos, gráficos e definicións do clima atmosférico e da temperatura, do vento e as precipitacións, tormentas, arcos da vella, auroras, imaxes de satélite e ata curiosidades como récords meteorolóxicos, animais e meteoroloxía, datos recollidos nas estacións situadas nas MeteoEscolas, etc. Achegar ao alumnado a ferramentas e canles que lle permiten atopar información “real” que se corresponde coa realidade que están vendo cos seus ollos. As imaxes reais dificilmente se poden superar; atopar semellanzas entre o que lles pedimos que observen no ceo e os símbolos que empregamos para constatalo é, máis das veces, un acto de fe.